Desde AGAPI (Asociación Galega de Produtoras Independentes) levamos máis de 27 anos promocionando a investigación e desenvolvemento do sector audiovisual. Desde o ano 2005, a Asociación publica anualmente o Anuario de Información do Sector Audiovisual Galego. Vencellado a este traballo continuado de información e difusión das empresas presentamos unha nova publicación que recolle entrevistas en profundidade cos responsables da produción independente galega.
A creación e publicación de ‘Conversas abertas. Estudo cualitativo de produtoras audiovisuais galegas’ conta co financiamento e apoio do Concello de Santiago de Compostela.
O estudo recolle a valoración e impacto que supuxo a pandemia nas produtoras galegas e unha pequena reflexión sobre o futuro do audiovisual. As entrevistas están clasificadas xeográficamente, iniciando o percorrido coas empresas produtoras situadas no Concello de Santiago, as empresas da comarca e por último as empresas localizadas ao longo das catro provincias galegas. Son un total de 26 entrevistas en profundidad que se clasifican en 11 do Concello de Santiago, 3 dos arredores e 12 doutras localidades galegas.
Este estudo permite achegar coñecemento de forma directa, dando voz aos produtores para falar do presente e futuro audiovisual. Publicacións coma esta supoñen unha oportunidade para difundir e poñer en valor a produción independente.
O estudo quedará visible para a súa libre descarga no apartado da web de Agapi > Revista > Informes.