A CRTVG seleccionou o proxecto ”Tralo Coronavirus”, da produtora M International Audiovisual, como documental sobre a Covid-19 que a canle pública contratará dentro das súas medidas de apoio ao sector audiovisual anunciadas en abril.

Neste marco, a CRTVG activou o pasado 17 de abril un procedemento para a selección de propostas para a contratación dun documental de actualidade relacionado coa Covid-19, elixido nunha reunión da Comisión de análise e valoración da CRTVG. Esta liña de apoio ao sector audiovisual é pública no Portal de Transparencia da Corporación.

”Tralo Coronavirus”, que dirixirá  Mercedes García-Nieto, foi escollido tanto pola súa estrutura narrativa e o seu enfoque humano e vivencial como pola viabilidade da súa fórmula de produción, a utilización do Arquivo da CRTVG e a participación de testemuñas da primeira liña de batalla.

O prazo para a recepción de propostas rematou o pasado 28 de abril cun total de dez proxectos rexistrados, o que amosa unha extraordinaria creatividade e profesionalidade por parte do sector audiovisual en Galicia. A Comisión de análise e valoración da CRTVG estudou todas as ideas e propostas, cun amplo abano de enfoques e puntos de vista: xornalísticos, de investigación, pedagóxicos, experimentais, sociais e humanos. A clave foi detectar unha proposta que reflectira como o ano 2020 marcará un antes e un despois, como foi ese tempo no que moitos profesionais non deixaron de traballar por todos en ningún momento, asumindo riscos para salvar vidas e para acompañar esta situación tan excepcional.

O proxecto ”Tralo Coronavirus” reúne o necesario nun documental de actualidade dirixido ao gran público e para emitir nunha franxa de gran consumo, con dous ingredientes fundamentais para narrar o excepcional momento actual: as noticias que foron marcando a cronoloxía dos feitos e as historias reais dos galegos a través dos seus testemuños, entrelazando entrevistas e momentos decisivos para narrar a evolución dos feitos.