A serie ‘Rapa’, cun total de 19 candidaturas, e a película ‘O Corpo aberto’, con 16, son as dúas grandes favoritas da XXI edición dos Premios Mestre Mateo, que se entregarán o 11 de marzo no Auditorio Municipal de Ourense.
Os finalistas déronse a coñecer este martes nun acto celebrado desde o Museo MEGA de Estrela Galicia, na Coruña, e presentado polos membros da Academia Galegado Audiovisual Esther Estévez, Iolanda Muíños e Xosé A. Touriñán.
Tras ‘Rapa’ -produción máis votada entre as 194 presentadas ao certame- e ‘O Corpo Aberto’, sitúanse a película ‘Código Emperador’, con oito nomeamentos, e a longametraxe de animación ‘Unicorn Wars’, con seis.
De entre todos os profesionais finalistas nesta XXI edición, Alberto Vázquez acumula tres candidaturas polo seu traballo en dirección, guión e dirección de arte de ‘Unicorn Wars’; as mesmas que Jorge Coira pola montaxe de ‘Código Emperador’ e pola dirección desta mesma película e da serie ‘Rapa’. Precisamente, ‘Rapa’ competirá contra ‘O Corpo Aberto’ por levar premios nas categorías de interpretación, mellor dirección, dirección de arte, dirección de fotografía, dirección de produción, guión, maquillaxe e peiteado, montaxe, son e vestiario. En concreto, en ‘Rapa’, Berta Ojea, Iria Sobrado e Paula Morado son finalistas a mellor interpretación feminina de reparto, mentres que Lucía Veiga e Mónica López optarán á de mellor interpretación feminina protagonista. Ricardo de Barreiro e Adrián Ríos son finalistas como intérpretes de reparto e Javier Cámara como protagonista.
En ‘O Corpo Aberto’, Elena Seijo e Federico Pérez Rey competirán por ser mellores actores de reparto e María Vázquez, Vitoria Guerra e Tamar Novas como protagonistas. As candidaturas de interpretación complétanse cos traballos de Denís Gómez (reparto) e Luís Tosar (protagonista) en ‘Código Emperador’; e Manuel Manquiña (protagonista) en ‘O home e o can’.
O premio á mellor longametraxe disputarase entre ‘O Corpo Aberto’, ‘Código Emperador’, ‘Life is life’ e ‘O home e o can’.
Ademais, tras oito edicións sen presenza de películas de animación, este ano haberá dúas: ‘Valentina’ e ‘Unicorn Wars’.
Pola súa banda, as finalistas a mellor documental son catro: ‘A foreign song’, ‘María Casares. A muller que viviu mil vidas’, ‘Non somos nada’ e ‘Onde máis doe’.
TELEVISIÓN
Na categoría de mellor serie para TV haberá dúas producións emitidas pola Televisión de Galicia, ‘A lei de Santos’ e ‘Saudade de ti’, ás que se suman outras dúas emitidas por ‘streaming’, que son ‘Operación Marea Negra’, de Amazon Prime Vídeo, e ‘Rapa’, de Movistar+.
En mellor serie web compiten ‘Delicias amargas’, ‘Historias vageniales’, ‘Prigandas’ e ‘Terapia de’. Ademais, Esther Estévez, Simone Saibene, Xosé A. Touriñán e Mario Brión Toucedo son os finalistas para mellor comunicador. Os tres primeiros tamén compiten por alzarse co galardón ao mellor programa con ‘Dígocho Eu’, ‘Cinephilia’ e ‘Catro Gatos’, a maiores de ‘Clac’.
Tamén en televisión, son finalistas á mellor realización: Rubén Veiga por ‘Malo Será!’, Simón Casal de Miguel por ‘Artificial Justice’, Simone Saibene por ‘Cinephilia’ e Jairo Iglesias por ‘Catro Gatos’. Así mesmo, as candidaturas a mellor videoclip son ‘A quincena do Apóstolo’ de Boyanka Kostova, ‘Cobiza’ de A banda da loba, ‘Noa’ de Guadi Galego e ‘Pano Corado’ de Tanxugueiras.