O vindeiro venres 28 terá lugar a mesa de debate ‘O audiovisual galego, industria audiovisual?’, dentro da programación do CeMAC.
A Fundación Carlos Casares organiza entre o 24 e o 28 de xuño a vixésima edición do Curso de Medios Audiovisuais de Celanova (CeMAC), dentro da oferta formativa de Extensión Universitaria da UVigo. Neste sentido, a entidade leva dende o ano 2004 levando cada verán á vila ourensá, berce de Curros Enríquez, a diversos profesionais do sector audiovisual para que analicen de forma e polo miúdo o seu labor diante das persoas que se matriculan no curso, que poden ser tanto alumnado universitario como público interesado no sector, xa que non hai restrición neste sentido.