O I Concurso de Webseries da CRTVG HISTORIAS DO CAMIÑO xa ten finalistas. Trátase dos traballos IMOS AVIADOS, de Adrián Reza, Iago Pousa, Verónica Pan, Joaquín Crujeiras e Ledicia Bellón; XOGO DE HEROES, de Roberto Conde, e TRES PITOS E UN CAPÓN, de Carlota Dans e Didac Dalmases. Este resultado feito público hoxe polo xurado, que elixiu de entre un total de 17 traballos, ten como obxectivo abarcar novos nichos de mercado na internet e apoiar a creatividade e o talento galego a través de formatos innovadores. Na súa primeira edición, está relacionado co fenómeno Xacobeo, por ser un elemento clave da cultura e da identidade galega, ao tempo que cumpre cunha imaxe de marca universal.
Os autores dos tres traballos seleccionados terán a posibilidade de perfeccionar o proxecto nun obradoiro impartido por profesionais de recoñecido prestixio. A CRTVG comprométese a comprar os dereitos de propiedade intelectual do episodio piloto do gañador para súa comunicación pública en crtvg.es. O xurado estivo composto por por Vanessa Grela, xefa do Servizo de Programas de TVG; Montse Besada, xefa do Servizo de Produción Allea da TVG; Ignacio Varela, coordinador do concurso de webseries da CRTVG; Antón Galocha, redacción de contidos da web da CRTVG, e Esther Medina, xefa da Área de Innovación e Novas canles da CRTVG. Esta iniciativa inscríbese dentro do proxecto Labovisión de Galicia, un laboratorio de innovación audiovisual posto en marcha en 2012 pola CRTVG co obxectivo de promover e apoiar o talento do noso país, orientado á procura e ao desenvolvemento de novas tendencias audiovisuais. Poden consultarse máis detalles sobre Labovisión no seguinte enlace.