Tras coñecer as candidaturas finalistas da vixésimo terceira edición dos Premios Mestre Mateo nun acto celebrado no Pazo da Deputación de Pontevedra, a Asociación Galega de Produtoras Independentes, Agapi, quere dar os seus parabéns a todo o audiovisual galego polo seu traballo e, moi especialmente, ás nove produtoras asociadas -que suman un total 56 nominacións en diferentes categorías- que optan por alzarse con algún dos galardóns do audiovisual galego.
As produtoras asociadas a Agapi nas que recaeron as nominacións son: Rebordelos, Gaita Filmes, Sétima Media, Abano Producións, Noveolas Producciones, Nós Produtora Cinematográfica Galega, Undodez, Portocabo e Cósmica, nove recoñecidas empresas que levan anos traballando no audiovisual feito en Galicia desde Galicia para o mundo.
Candidaturas
A serie ‘Rapa’ de Portocabo é a produción máis votada polos académicos, con 18 candidaturas, entre as que están a de “Mellor serie de TV”, “Mellor dirección” ou a nominación a sete dos seus actores como finalistas nas categorías de interpretación de reparto e protagonista. Tamén da produtora Portocabo a longametraxe ‘+ Cuñados’, aspira a alzarse co premio a “Mellor longametraxe”, ademais de estar nominada en cinco candidaturas máis.
Na pugna cara a consecución do premio á “Mellor longametraxe” tamén están as películas das socias de Agapi: ‘As Neves’, de Cósmica, produtora que suma un total de 13 candidaturas máis pola realización desta película, entre as que se pode destacar á “Mellor dirección” e “Mellor interpretación feminina de reparto”, “Mellor interpretación feminina protagonista”, e ‘Xustiza artificial’, de Abano Producións.
Tres dos catro finalistas a “Mellor documental” tamén forman parte da rede tecida por Agapi: ‘Aurora’, de Gaita Filmes; ‘Filmei paxaros voando’, de Sétima Media, e ‘Prefiro condenarme’, de Nós Produtora Cinematográfica Galega, cuxo guión, de Margarita Ledo e Eva Veiga, tamén é finalista xunto cos traballos de Pepe Coira e Fran Araújo por ‘Rapa’ e Sonia Méndez por ‘As Neves’.
Oito curtametraxes compiten na súa categorías, entre elas, ‘Platónico, plantónica’, de Rebordelos con guion e montaxe de Xacio Baño, e na que constrúe un ensaio visual sobre a semiótica da imaxe.
Noveolas Producciones está nominada en tres categorías co seu programa ‘Cinephilia’, a “Mellor programa”, “Mellor comunicador” e “Mellor realización” para Simone Saibene, creador de Noveolas.
Cabe destacar o traballo da produtora Undodez que opta a varios premios, entre eles, tres a “Mellor programa” por: ‘Nosoutras’, ‘Recollendo músicas’ e ‘Bibopalula’.
Os premiados daranse a coñecer na gala de entrega de premios que se celebrará o sábado 15 de marzo no Lalín Arena, Pontevedra.